Ársreikningur SP - fjármögnunar, 5, 5 milljarða rekstrarhagnaður!

Þann 7. október sl. skilaði SP fjármögnun inn ársreikningi fyrir 2009 (eftir að lögbundinn frestur til þess var runnin út) en þetta er sami dagur og SP lauk við fyrstu lotu endurútreikninga á lánum sínum út frá dómi Hæstaréttar sem dæmdi að lán SP og Lýsingar væru lán í íslenskum krónum en ekki lán í erlendri mynt.  Félagið er með 5,5 milljarða rekstrarhagnað fyrir árið 2009 skv. ársreikningi sem verður að teljast helvíti flott hjá fyrirtæki sem var nánast gjaldþrota 2008 og þurfti að fá undanþágu frá FME til áframhaldandi starfsemi vegna of lágs eiginfjárhlutfalls sem var neikvætt um 33,5% en tekur nú stökk upp á við í plús 28,8%!

Skemmtilegt er að lesa í ársreikningnum sem áritaður er af KPMG endurskoðun að SP hafi verið að lána í erlendri mynt, félag sem hefur ekki einu sinni leyfi frá Fjármálaeftirlitinu til að stunda gjaldeyrisviðskipti fyrir hönd viðskiptavina sinna og félag sem hefur ekki getað sýnt viðskiptavinum sínum eina einustu kvittun fyrir gjaldeyrisviðskiptum vegna lána til þeirra. Þar að auki hafði Hæstiréttur dæmt að lán SP væru í íslenskum krónum, nokkrum mánuðum áður en þessum glæsilega ársreikningi var skilað inn til Ríkisskattstjóra.

Á bls. 10 í ársreikningnum (þeir virðast reyndar hafa gleymt að skrá inn blaðsíðunúmer) segir: „Vegna núverandi efnahagsástands á Íslandi er óvissan um getu lántakenda til að greiða til baka lán sín til félagsins veruleg, sérstaklega í þeim tilfellum þar sem lán hafa verið veitt í erlendum gjaldmiðlum til lántakenda sem hafa litlar sem engar tekjur í erlendum gjaldmiðlum."

Erlingur A. Jónsson fjallar meira um ársreikning SP.

Athugasemdir

[Hólmsteinn A. Brekkan (IP-tala skráð) 8.11.2010 kl. 19:13]

Mér hitnar alltaf um eyrun þegar ég heyri eða les eitthvað um SP fjármögnun.

"Kálið er ekki sopið þó í ausuna sé komið."

Hefur einhver eftirlit með því hvernig þessir aðilar eru að "endurreikna" lánin? Nei. Enn sem fyrr eru þessir aðilar algerlega eftirlits- og aðhaldslausir.

Við erum búin að sýna þeim ómælda þolinmæði sem nú er þrotin. Kominn tími til að taka á móti og glíma. Verum minnug þess að Davíð felldi Golíat með einni lítilli steinvölu! 

[Ibba Sig. (IP-tala skráð) 8.11.2010 kl. 20:23]

Ótrúlegt að eftirlitsaðilar séu ekki enn búnir að taka við sér þegar kemur að þessu glæpafyrirtæki. Svo maður tali nú ekki um dómstólana. Hvað þarf eiginlega til?